Autor: Juan Davila

Cristian Pregal eclipsa unha victoria antolóxica

A tensión aumenta progresivamente nos partidos do Mundialiño Ar-Vi. Se a semana pasada o campionato deixábanos un resultado moi axustado para o FC Sapphire fronte ao Gráficas Ibernón, nesta ocasión a igualdade aínda foi maior.
Un CCARro de Balones e o Tuypan Team medíanse onte nun partido que ía servir para calibrar a calidade de ambos os dous conxuntos. A priori, os celestes partían co cartelón de favoritos, mentres que os da panadaría Tuypan están a valer o seu papel de equipo revelación.
Dende ben cedo, Juan Davila puña en vantaxe ao equipo capitaneado por Pallas nunha combinación con Manu Barreira, quen tamén sería o seu socio no segundo tanto. Pouco lle durou a ledicia ao CCARro, pois Quintairos igualaba o marcador en dúas ocasións para marchar ao descanso con 2-2, aínda que cos azuis volcados sobre a meta rival.
A segunda metade foi unha constante alternativa, o empate parecía valer aos de negro e era neses intres onde o CCARro amosaba a súa mellor imaxe. En cambio, cando os locais estaban por diante, eran os de Pregal os que posuían o control do balón. Desta forma chegouse a uns últimos minutos moi parexos, nos que Juan Davila parecía desequilibrar o encontro ao marcar un gol de falta directa. Sen embargo, con tan só un minuto para a reacción, os azuis non foron quen de manter a pelota e na última xogada, Pregal puña as táboas no electrónico.

Goles: 1-0 Juan Davila, 1-1 Gabi Quintairos, 2-1 Juan Davila, 2-2 Gabi Quintairos, 3-2 Juan Davila, 3-3 Aarón Martín, 4-3 Juan Davila e 4-4 Cristian Pregal.

Árbitro: Álvarez Calderón. Partido dirixido con aparente solemnidade. 8,4 normal.

MVP: Juan Davila.

Próximo encontro: 17/12/2019 ás 22:00 no pavillón de Candeán, Un CCARro de Balones-Tuypan Team, dirixido por Pregal Fernández. O día 10/12/19 non se disputa Mundialiño, máis a pista está á disposición dos asociados.

 

Enlace fotos aquí.

Nervios a flor de pel entre o Shappire e o Ibernón

Intenso encontro o que se viviu na noite de onte na pista de Candeán. O Sapphire e máis o Ibernón enfrontábanse nunha loita por achegarse ao liderato en solitario de Tuypan, aínda que o partido se cadra tiña máis valor para os vermellos, pois xa levaban un partido máis que o seu oponente.
Amado Alonso, o colexiado do encontro e que ademais tería gran importancia no resultado final, asubiou o comezo e, ao pouco tempo, Adri Castro adiantaba o seu equipo. Ademáis de patrocinador, tamén goleador. Nese intre, os verdes botaron man da súa mellor baza ‘Charlie’. A mala fortuna ceibouse ca escadra adestrada por Mingos Prieto, pois a súa estrela lesionábase ao pouco tempo de entrar no campo..
Ante un Gráficas Ibernón totalmente desmoralizado pola baixa, os ‘festeiros’, xa cos dentes longos, tentaron facer fenda na ferida, máis Andrés Seijo colleu o timón do equipo e, en dúas xogadas soberbias, deulle a volta ao electrónico. Cristian Vázquez puña a puntiña ao filo do descanso. Desta forma chegábase ao intermedio cun 1-3.
Tralo tempo de lecer, os do pub vigués concienciáronse na tarefa de frear os contragolpes que tanto dano lles fixeran no primeiro tempo; pola súa parte, os da imprenta confiaron en que a vantaxe lograda sería suficiente para facerse cos tres puntos. Gran erro. A segunda metade foi un continuo asedio dos vermellos e Uxío rapidamente recurtaba distancias. A falta de dez minutos Alberto Bastos igualaba a contenda. O Ibernón comezou entón a darse de conta de que, a este paso, lle verían a boca ao lobo e botaron man dalgún retraso nas reanudacións para gañarlle ao cronómetro, máis Amado Alonso foi estricto e, nunha destas, os verdes levaron da súa mediciña. O colexiado dictaminou que Veloso cometera infracción nun saque. Con picardía, Borja Aonso colleu o balón e apresurouse a poñelo en xogo, collendo á defensa do Ibernón nas minchas. Balón para Alberto Bastos que asiste a Omar que, a pracer, remonta o partido e pon a guinda ao pastel.

Goles: 1-0 Adri Castro, 1-1 Andrés Seijo, 1-2 Andrés Seijo, 1-3 Cristian Vázquez, 2-3 Uxío Caamaño, 3-3 Alberto Bastos e 4-3 Omar Berlier.

Árbitro: Alonso Alonso. Dirixiu con dilixencia e tranquilidade o partido. 8,5 normal.

MVP: Andrés Seijo.

Próximo encontro: 03/12/2019 ás 22:00 no pavillón de Candeán, Tuypan Team-Un CCARro de Balones, dirixido por Álvarez Calderón.